Jizzaxda karantin bilan bog‘liq qoidalarni buzib, IIB xodimiga qarshilik qilgan shaxsga nisbatan jinoyat ishi qo‘zg‘atildi. Bu haqda Bosh prokuratura matbuot xizmati xabar berdi.

Ma’lum bo‘lishicha, 1-aprel kuni 32 yoshli (sudlangan, ishsiz) fuqaro S.U. Lacetti’sini maxsus ruxsatnomasiz boshqarib, Samarqand—Toshkent yo‘nalishining G‘allaorol tumani hududiga yetganda shu yerdagi yo‘l-patrul xizmati maskanida xizmat vazifalarini bajarayotgan Milliy gvardiya va sanitariya-epidemiologiya xodimlari tomonidan to‘xtatilgan.

Jizzax viloyati YHXB YPX inspektori S.U.dan tegishli hujjatlarni taqdim etishini so‘raganda u inspektorning qonuniy talablarini bajarishdan bosh tortib, uning ko‘krak qismiga zarb bilan urgan. Qochish maqsadida mashinasini Toshkent tomon haydab ketayotganida mashinaning chap tomon old eshigiga osilib qolgan YPX inspektorini 600 metr masofagacha sudrab ketgan.

Holat yuzasidan shu kunning o‘zida G‘allaorol tumani prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va 257-1-moddasi (sanitariyaga oid qonun hujjatlarini yoki epidemiyaga qarshi kurash qoidalarini buzish) bilan jinoyat ishi qo‘zg‘atilgan va haydovchi ushlangan.

Eslatib o‘tamiz, O‘zbekistonda 30-mart kuni soat 06:00 dan shaxsiy transportdan foydalanishga cheklov qo‘yildi. Faqat Davlat xizmatlari markazlari tomonidan beriladigan maxsus ruxsatnoma (stiker)ga ega avtotransport vositalari harakatlanishiga ruxsat berildi.