Rossiya kommunikatsiyalar va aloqa vaziri Maqsut Shadayev internet-kompaniyalarga tarmoqdagi kontentni optimizatsiya qilish yuzasidan murojaat qildi. Vazir saytlar va ilovalarda avtomatik ravishda videoni faollashtirishni hamda videokontentning sifati darajasini tushirishni so‘ramoqda. Bu haqda “RBK” xabar qilgan.

Mobil ilovalarda video sifatini 720p ga, brauzerlar orqali tomosha qilganda esa 1080p (Full HD)gacha tushirish iltimos qilinmoqda. Vazirlik internet-kompaniyalarga shu mazmunda xat chiqargan. Rambler Group, “MegaFon” va “Mamba” tanishuvlar sayti vakillari ushbu ma’lumotni tasdiqlagan.

Vazir tomonidan imzolangan xatda ushbu choralarni qo‘llash karantin davrida abonentlarga ko‘rsatilayotgan xizmatlar sifatining keskin tushib ketishiga yo‘l qo‘ymaydi. Uning qayd etishicha, uyida karantinda o‘tirgan odamlar sonining ko‘payishi internet-trafikning ortishiga sabab bo‘lgan.

“Tarmoqda abonentlarning masofadan ishlash va o‘qishga o‘tgani sabab ham yuklama keskin ortgan, shuningdek, striming servislarini ishlatish tendensiyasi ham ortib bormoqda”, — deyiladi xatda.

Mart oxirida Rossiyada internet-provayderlari tomonidan xalqaro tarmoqdan foydalanish 10-30 foizga oshgani ma’lum qilingandi.

“Internet-video” assotsiatsiyalari rahbari Aleksey Birdin xatni olganini tasdiqlab, ushbu holat o‘z servislariga taalluqli emasligi, uning kompaniyasi axborot tarqatuvchi tashkilotchilar reyestriga kirmasligi, shuningdek, onlayn-kinoteatrlar va boshqa servislar har yili yangi yil ta’tillarida duch keladigan og‘ir yuklamaga dosh bergan videolar servisi hozir ham yaxshi holatda turganini bildirgan.

Uning so‘zlariga ko‘ra, taklif etilayotgan chora tarmoqdagi yuklamani sezilarli darajada kamaytiradi, chunki aksariyat onlayn-servislar adaptiv striming texnologiyasiga o‘tgan, bunda aloqa uzatish kanali yuqori sifatga dosh bera olmasa, avtomatik ravishda sifati pastroq kontent taqdim qilinadi. Shuningdek, Birdinning aytishicha, ushbu chora taxminan 1 million uy xo‘jaligiga ta’sir qiladi, sababi Full HD formatidagi video tomosha qilishga o‘rganganlar soni u qadar ko‘p emas.

Mart o‘rtalarida bir nechta yirik internet-kompaniyalar video sifatining tushirilishi haqida e’lon qilgan. Xususan, AQShning Netflix kompaniyasi aprel oyi davomida Yevropa bo‘ylab efirga uzatiladigan film hamda seriallar sifati koronavirus pandemiyasi sabab yuzaga kelgan yuklama oqibatida pasaytirilishini bildirgan.

Internet tadqiqotlari bosh direktori Karen Kazaryanning so‘zlariga ko‘ra, Yevropada, jumladan, Amsterdamda internet trafik bilan bog‘liq muammolar kuzatilgan, shu sababli mamlakat rasmiylari Facebook va Google kabi yirik kompaniyalarga trafikni chegaralashni taklif qilgan.

“Hozircha Rossiyada trafik bilan bog‘liq muammolar yo‘q, ichki tarmoqlar normal holatda, video sifatini tushirishda mantiq ko‘rmayapman. Bu kabi choralar orqali Aloqa vazirligi trafikning chorak qismini qisqartirishi mumkin, lekin odamlar bunda qandaydir o‘zgarish sezmaydi, sababi internet shundoq ham yaxshi ishlab turibdi”, — deydi Kazaryan.

Shuningdek, u asosiy trafik ishlab chiqaradigan servis — YouTube ekani va kompaniyaning vazirlik talabini bajarishi dargumonligini ham qayd etgan.