Bosh Sahifa - Хабарлар - ЎЗБЕКИСТОН - G‘aniyev yana diqqat markazida. So‘xliklar hokimdan qattiq norozi bo‘lishdi
G‘aniyev yana diqqat markazida. So‘xliklar hokimdan qattiq norozi bo‘lishdi
2-06-2020, 16:47 422
G‘aniyev yana diqqat markazida. So‘xliklar hokimdan qattiq norozi bo‘lishdi

Yangiliklarni Telegramda Kuzating!

Shu kunlarda O‘zbekistonning Qirg‘iziston bilan chegarasi hududida vaziyat keskinlashdi. So‘x esklavidagi Chashma qishlog‘i va Qirg‘izistonning Qadamjoy tumanidagi qishloq aholisi o‘rtasida buloqdan foydalanish bo‘yicha kelib chiqqan mojaro ikki davlat hukumatlari vakillarining muzokaralari evaziga tinchitildi.



Lekin vaziyat viloyat hokimi Shuhrat G‘aniyevning ehtiyotsizligi tufayli yanada keskinlashishiga bir baxya qolgan.

O‘zbekiston bosh vaziri Abdulla Aripov 1 iyun kuni «Chashma» chegaraoldi hududida yuz bergan mojaro munosabati bilan So‘x tumaniga tashrifi davomida mahalliy aholi vakillari bilan uchrashdi. Uchrashuvda so‘xlik faollar viloyat hokimi Shuhrat G‘aniyevning faoliyatidan qattiq norozilik bildirishgan.

Internetda tarqalgan videoda bosh vazir bilan uchrashuvda so‘zga chiqqan mahalliy faollardan biri «xalq G‘aniyev kerak emas deyayotgani»ni aytadi. Uning so‘zlari boshqalar tomonidan olqishlanadi.

«Nima uchun, bilasizmi? Xalq G‘aniyevni hurmat qilardi. G‘aniyev mana bu yerga kelib, «kerak bo‘lsa So‘xni xaritadan o‘chirtirib tashlayman», debdi...», degan mahalliy faol.


Bundan tashqari, bosh vazir viloyat hokimiga so‘z berganida yig‘ilganlar baqir-chaqir qilib, keskin norozilik bildirishgan.


1 iyun kuni internetda So‘x tumanida o‘tgan yig‘ilishda viloyat hokimi tomonidan tuman aholisiga tahdid qilingani haqidagi audio tarqaldi (ushbu yig‘ilish qachon va qayerda bo‘lib o‘tgani haqida aniq emas).

«Yana bir marta so‘rayapman. 74tasini olib ketaymi Farg‘onaga? Yo‘qmi?.. Mana, kelishdik. Yana biror gap bo‘lsa, boshqa kelib o‘tirmayman. Bilib qo‘yinglar.

«So‘xliklar – noshukr odamlar» degan sarlavhali maqola tayyor turibdi gazetada. Bugun televideniyedayam ketsinmi, Farg‘ona televideniyesida?

Noshukrchilik qilmasin. Qani, Lenburgdan kim kelgan? Ikkinchi masala, Lenburg qishlog‘idagilar shunday qilaversa boshqacha gap ketadi. Juda yaxshi bilasizlar, qaysi qishloq janjalkash bo‘lsa, biz uni So‘x tumani xaritasidan nima qilamiz Farhod aka. So‘x tumani xaritasidan o‘chirib qo‘yamiz. Hamma ta'minot to‘xtaydi. Tushunarlimi yoki tushunarli emasmi? (hokim stolga qayta-qayta musht uradi).

Sizlar bizga katta tashvish olib bergani o‘tiribsizlarmi? Kimga kerak bu tashvish? 74 yigitni hozir qamasinmi? Tayyormi ro‘yxati, ichki ishlar boshlig‘i, prokuror?

Bo‘ldi, 74tasini bo‘lmasam jo‘natvoramiz, shu yerda hozir harbiylar berasizlar, qurolli yigitlardan. Farg‘onaga olib borib qamaysizlar 74tasini. Farg‘onaga olib borib, qamoqda tergov o‘tkazasizlar.

Nima bo‘ladi hozir, buyoqqa keling. Hozir janjal bo‘ladi, So‘x daryosida o‘yin ketadi, Farg‘ona viloyatining Farg‘ona, Rishton, Oltiariq, Bag‘dod, Toshloq, Qo‘shtepaga suv bormaydi. Keyin nima bo‘ladi? Keyin Farg‘onadagi boshqa shaharlar So‘x haqida nima deydi? Karim aka Vodilga borsa nima bo‘ladi, toshbo‘ron qiladi. Shu kerakmi?

2013 yil 6-7-8 yanvardagi voqealarni bir eslataymi? Butun O‘zbekistonga farg‘onaliklarni sharmanda qilgan so‘xliklar bo‘lgan. Hushyor voqealarini eslataymi? Shu voqealarni eslataymi? Kimga kerak bo‘lib turibdi hokim o‘rinbosari? Kimga kerak bo‘lib turibdi xalq qabulxonasi rahbari?», degan viloyat hokimi.

Ma'lum bo‘lishicha, viloyat hokimi 2 iyun kuni So‘xga borib, aholidan uzr so‘ragan va tartibsizlikda ishtirok etganlar jazolanmasligiga va'da bergan.

«Men harbiylarga ham, ichki ishlar organlari xodimlariga ham aytaman. Bilib-bilmay sho‘xlik qilgan yoshlarga tegishmaydi.

Men qolaman, bir-ikki oqsoqollar qolsin, bizning ishlashimizga xalal bermanglar. Men tirik bo‘lsam, bir qarich yerimni ham, bir paqir suvimni ham hech kimga berib qo‘ymayman. Shuning uchun, sizlardan iltimos, ishlashimga xalaqit qilmanglar. Jon ukalar, yoshlik qilib qo‘ymanglar, harbiylarning ishiga ham, chegarachilarning ishiga ham, mening ishimga ham xalaqit qilmanglar. Qizishganning foydasi yo‘q. Hamma masalani yechamiz. Sizlar noto‘g‘ri ish qilmanglar, biz o‘zimiz hal qilamiz», degan viloyat hokimi.

2011 yildan buyon Farg‘ona viloyatiga rahbarlik qilayotgan Shuhrat G‘aniyev tilga olgan Hushyor voqealari o‘z vaqtida O‘zbekiston va Qirg‘iziston munosabati sovuqlashishiga sabab bo‘lgandi.

2013 yil yanvar oyi boshida So‘x-Botken chegarasida keskinlik yuzaga kelgan, o‘shanda qirg‘izistonlik chegarachilar o‘zbekistonliklarni o‘qqa tutib, 5 kishini yaralagan, shundan so‘ng So‘x tumanining Hushyor qishlog‘idagilar Qirg‘iziston hududiga o‘tib, bir necha mashinalarga o‘t qo‘yishgan. Natijada O‘zbekiston va Qirg‘iziston o‘rtasidagi chegaralar yopilgan.
Manba kun. Uz
Комментарии (0)
Комментировать
Кликните на изображение чтобы обновить код, если он неразборчив