Navoiy viloyati IIB PPX va JTSB xodimlarining tezkor harakati tufayli 1 yoshli qizning hayoti saqlab qolindi, deb xabar bermoqda viloyat IIB matbuot xizmati.

Qayd etilishicha, 3-aprel kuni soat taxminan 21:00 lar atrofida Navoiy viloyatining Karmana tumanidan Navoiy shahri hududiga o‘tuvchi chegara postida harakatlanib kelayotgan yengil mashina tungi navbatchilikda o‘z xizmat vazifasini o‘tayotgan PPX va Milliy gvardiya xodimlarining e’tiborini tortgan.

Mashina xodimlar tomonidan yo‘l chetiga to‘xtatilganda, fuqaro L.Y. rafiqasi bilan birgalikda hushsiz holatdagi 1 yoshli qizini shifoxonaga olib bormoqchi ekanligi ma’lum bo‘lgan.

Qizchaning hayoti tobora xavf ostida qolayotganligini payqagan xodimlar o‘sha vaqtning o‘zida zudlik bilan unga birinchi tez tibbiy yordam ko‘rsatgan va o‘z xizmat mashinasida tezlik bilan harakatlanib ularni viloyat shoshilinch tez tibbiy yordam shifoxonasiga olib borgan.

Mazkur holat yuzasidan viloyat shoshilinch tez tibbiy yordam shifoxonasining oliy toifali shifokori Bobomurod Pardayevning ma’lum qilishicha, bemor 39,5 daraja yuqori isitma haroratida hushsiz holatda shifoxonaga olib kelingan. 2 daqiqalik kechikish uning hayotini ayanchli yakunlashi mumkin edi. Ayni payda qizcha hayotga qaytgan uning salomatlligi yaxshi hamda shifokorlar nazoratida.

Eslatib o‘tamiz, koronavirus infeksiyasi tarqalishiga qarshi kurash doirasida Toshkent shahri va bir qator shaharlarga transportning kirish-chiqishi cheklandi, viloyatlararo transport harakati to‘xtatildi. Bundan tashqari, shaxsiy avtomobilda maxsus ruxsatnomasiz harakatlanish taqiqlandi, fuqarolarga zaruratsiz uydan chiqmaslik tavsiya etildi.