Futbol bo‘yicha Avstraliya chempionati oliy divizioni klubi “Sentral Kost Meriners” va yengil atletika bo‘yicha 8 karra Olimpiya chempioni, afsonaviy Useyn Bolt shartnoma bo‘yicha kelisha olmadi. Shu sababli Bolt jamoani tark etdi. 

Sprinterlik faoliyatini tugatgandan keyin o‘zini futbolda sinab ko‘rmoqchi bo‘lgan Bolt avgust boshida klub bilan shartnoma imzolagandi. Unga ko‘ra, Bolt professional shartnoma tuzish imkoniyati berilgan holda jamoa bilan mashq qila boshlagan.

Yamaykalik shu vaqt ichida klub safida ikkita o‘rtoqlik uchrashuvida ishtirok etib, ulardan birida 2 ta gol urishga muvaffaq bo‘lgan. 

Tomonlarning kelisha olmaganiga Boltga taklif qilingan maosh sabab bo‘lgan. OAVning ma'lum qilishicha,  klub Boltga yiliga 150 ming dollar taklif qilgan, yamaykalik esa 3 mln dollarlik maosh olishni istagan.

Klubning rasmiy bayonotida uzoq davom etgan muzokaralardan keyin Bolt klub taklifini rad etgani aytilgan.

“Useyn Boltga futbol faoliyatini klubimizda davom ettirishga imkon beradigan kelishuvga kelolmaganimizga qaramay, u o‘tgan 8 hafta ichida jamoamizning bir qismi bo‘lganidan xursandmiz”, deb aytilgan klub bayonotida. 

O‘z navbatida sportchi klubga minnatdorlik bildirib, unga start olgan yangi mavsumda muvaffaqiyatlar tilab qolgan.